Willy Brandt

Dr Willy Brandt (* 18. Dezämber 1913 z Lübeck as Herbert Ernst Karl Frahm; † 8. Oktober 1992 z Unkel) isch e dytsche Bolitiker (SPD) gsii. Är isch vu 1969 bis 1974 dr viert Bundeschanzler vu dr Bundesrepublik Dytschland gsii. Dervor isch er vu 1957 bis 1966 Regierede Burgermaischter vu Berlin un vu 1966 bis 1969 Bundesusseminischter un Vizechanzler im Kabinett Kiesinger gsii. Vu 1964 bis 1987 isch dr Brandt Vorsitzer vu dr SPD un vu 1976 bis 1992 Bresidänt vu dr Sozialistische Internationale gsii. Fir syni Oschtbolitik, wu uf Entspannig un Uusglych mit dr Sowjetunion, dr DDR un dr ibrige Oschtblockstaaten uusgrichtet gsii isch, het er anne 1971 dr Friidesnobelbryys iberchuu.